Gamli bærinn að Austur-Meðalholtum

Austur-Meðalholt er einn fárra torfbæja á landinu. Öll hús sem byggð hafa verið á bæjarhólnum hafa ávalt verið torfhúsabyggingar og flestar byggðar á grunni bygginga frá 19. öld eða eldri. Í öllum hugsunarhætti, byggingaaðferðum og notkun byggingarefnis er Austur-Meðalholt skilgetið afkvæmi íslenskrar torfbæjarhefðar, búskaparhátta og bændamenningar. Austur-Meðalholt er dæmigert mannvirki fyrir byggingastíl torfbæja á suðurlandi á ofanverðri 19. öld. Baðstofan og ýmsir aðrir bæjarhlutar voru endurnýjaðir og lagfærðir 1895 (árið fyrir Suðurlandsjarðskjálftann) og stóðu flest húsin því skjálftann allvel af sér. Búið var hefðbundnum blönduðum búskap á Austur–Meðalholtum þangað til 1965. Búskaparhættir voru alla tíð með gamla laginu og vélknúin tæki aldrei notuð við búskapinn. Í byrjun 20. aldar voru 12 torfhús á bæjarhólnum ásamt heygarði og kálgarði umluktum torfiveggjum. Þá er á svæðinu gömul hlaða og hesthús í góðu ástandi. Veruleg uppbygging hefur farið fram við gamla bæinn að Austur-Meðalholtum síðan 1986. Sex hús eru til staðar en þau munu verða átta sem mynda samstæða heild á bæjarhólnum.